कलाशैली संवाददाता । आज शुक्रबार (बैशाख १२) देखि दुई नेपाली फिल्म ‘भूठान’ र ‘खेल’ रिलिज भएका छन् । यसै साता गरिएका दुवै फिल्मले प्रिमियरमा उपस्थित पाहुनाबाट उत्कृष्ट समीक्षा बटुलेका छन् भने यसको प्रभाव बक्सअफिस कलेक्सनमा कस्तो पर्ने हो, त्यसको लेखाजोखा आजबाट नै शुरु हुनेछ ।
विनोद पौडेलको निर्देशन रहेको ‘भूठान’ ले देशभरका हलबाट १ सय २० शोज पाएको छ भने अनुराग प्रधान निर्देशित ‘खेल’ ले ८८ शोज पाएको छ । शुक्रबारदेखि नै नेपालीबाहेक एक हिन्दी हरर फिल्म ‘ओए भुतनी के’ पनि रिलिज भएको छ भने १९९४ नोभेम्बर ४ मा प्रदर्शनमा आईसकेको आमिर खान, सलमान खान र रविना टण्डन अभिनित ‘अन्दाज अपना अपना’ पनि ३० वर्षपछि शुक्रबारदेखि नै पुनः प्रदर्शनमा आएको छ । राजकुमार सन्तोषीको निर्देशन रहेको यस फिल्मले भने नेपालमा ४४ शोजबाट प्रदर्शनको खाता खोलेको छ ।
देशभरका हलमा गरी शुक्रबार कुल ४ सय ६६ शोज चल्नेछन् । जसमा ७ नेपालीसहित १२ फिल्म प्रदर्शनमा छन् । भूटानबाट खेदिएर नेपालहुँदै तेस्रो मुलुक पुनर्बासका लागि जना बाध्य भूटानी शरणार्थीको घर फिर्तीको आशा र संघर्षमा केन्द्रित फिल्म ‘भूठान’ ले उपत्यकाभित्र ५९ र बाहिर ६१ शोज पाएको छ । देशको ठूलो मल्टिप्लेक्स चेन क्यूएफएक्सले हरिवंश आचार्य अभिनित यस फिल्मलाई २७ शोज दिएको छ ।
त्यस्तै, सुरक्षा पन्त स्टारर हरर जनराको ‘खेल’ ले पाएका ८८ शोजमध्ये उपत्यकाभित्र ४२ र बाहिर ४६ शोज छन् । शुक्रबार चल्ने कुल ४ सय ६६ शोजमध्ये ‘भूठान’ ले पाएको शोज झन्डै २६ प्रतिशत रहेको छ भने ‘खेल’ को लगभग १९ प्रतिशत हो ।
सन्तोषजक शोज पाएका ‘भूठान’ र ‘खेल’ दुवैका प्री–बुकिंग भने सन्तोषजनक रहेनन् । पछिल्लो समय प्रदर्शनमा आएका नेपाली फिल्मका इनिसियल ओपनिंग भने उत्साहजनक देखिन छोडेको छ । प्रिमियर प्रतिक्रिया सुखद बोकेका भएपनि ‘भूठान’ र ‘खेल’ को दर्शक समीक्षाले दुवैको बक्सअफिस कलेक्सनको निर्धारण गर्नेछ ।
नयाँ वर्षको छेको पारेर प्रदर्शनमा आएको कृषा चौलागाईं निर्देशित फिल्म ‘पिताम्बर’ प्रदर्शनको तेस्रो साता प्रवेश गर्दै शुक्रबार ७१ शोज पाएको छ । त्यसैगरी, मिलन चाम्स निर्देशित फिल्म ‘अञ्जिला’ ले देशभर २५ शोज पाउँदा प्रदर्शनको ५० औं दिनमा आईपुगेको फिल्म ‘होस्टेल ३’ ले शुक्रबार काठमाडौंको रञ्जना सिनेप्लेक्समा मात्र १ शोमा सीमित भएको छ । त्यसैगरी, प्रदर्शनको आठौं सातामा प्रवेश गरेको फिल्म ‘लाज शरणम्’ ले ५, ‘वसन्त’ ले ५ शोज पाएका छन् ।
हिन्दी फिल्म ‘ओए भुतनी के’ ले ४२ शोजबाट प्रदर्शन शुरु गरेको छ भने केसरी च्याप्टर २ ले ४५, ‘अन्दाज अपना अपना’ ले ४४ र ‘जाट’ ले १७ शोज पाएका छन् । हलिउड फिल्म ‘अ माइन्डक्राफ्ट मुभी’ ले शुक्रबार देशभरबाट मात्र ३ शोज पाएको छ ।
प्रदर्शनमा रहेका ७ नेपाली फिल्मले देशभरबाट कुल ३ सय १५ शोज पाउँदा विदेशी ५ फिल्मले १ सय ५१ शोज पाएका छन् ।
