कलाशैली संवाददाता । वर्षको पहिलो शुक्रबार आज नेपालमा कुनै पनि नेपाली फिल्म रिलिज हुने छैनन् । यस मितिमा केवल अक्षयकुमार स्टारर हिन्दी फिल्म ‘केशरी : च्याप्टर २’ मात्र यस साताको फ्राइडे रिलिज अन्तर्गत छ ।
त्यसबाहेक फिल्म ‘कर्मा’ र ‘पिताम्बर’ दोस्रो सातामा प्रवेश गरेका छन् भने प्रकाश सपूतको ‘वसन्त’ तेस्रो सातामा चल्दैछ । मिलन चाम्सको ‘अञ्जिला’ले पनि सुखद प्रदर्शनको छैठौं सातामा आफुलाई पुर्याएको छ । कुमार कट्टेलको ‘लाज शरणम’ले भने बिहिबार ५१ दिनको यात्रा तय गर्दै अघि बढेको छ । त्यसबाहेक फागुन २३ देखि प्रदर्शनमा आएको सशान कँडेलको ‘होस्टेल ३’ ले पनि यो साता केही शोसहित आफुलाई हलमा अड्याईरहेको छ ।
नयाँ वर्षको छेको पारेर गत साता अधिक शोजसहित रिलिज भएका दुई एक्सन फिल्म ‘कर्मा’ र ‘पिताम्बर’को शोज अनुपातमा दोस्रो सातासम्म आईपुग्दा निकै तलमाथि भएको छ । पहिलो साता कम्तिमा १२४ शोजसहित रिलिज भएको सौरभ चौधरी निर्देशित फिल्म ‘कर्मा’ले निकै सुस्त व्यापार गरेपछि प्रदर्शकले दोस्रो सातामा यसको शोजमा निकै कटौती गरेका छन् । प्रदर्शनको आठौं दिनमा कर्माको शोजमा ९३ प्रतिशतले गिरावट आएको छ ।
विपिन कार्की स्टारर कर्मालाई देशभरका ८ हलले एक–एक शो दिएका छन् भने यो फिल्म दाङमा छायांकन भएकोले पनि हुनसक्छ, घोराहीको भीएफएक्स सिनेमाजले मात्र ३ शोज दिएर दर्शकको अपेक्षा गरेको छ । १२४ शोज पाएर पनि एक सातामा मुश्किलले २५ लाखमाथिको व्यापार गरेको ‘कर्मा’का लागि दोस्रो साता पाएको ९ शोज केवल फिल्म एक सातामा नै उत्रिएन भन्नुमा बाहेक अन्य फाइदा खासै देखिदैन ।
‘कर्मा’सँगै कम्तिमा १७० शोजसहित प्रदर्शन थालेको कृषा चौलागाईं निर्देशित फिल्म ‘पिताम्बर’ले भने सप्ताहन्तभन्दा पछि व्यापारमा केही पिकअप लिएको देखियो । समीक्षबाट पनि सन्तोषजनक प्रतिक्रिया बटुलेको यस फिल्मलाई दर्शकले पनि मनोरन्जनात्मक माने । फलस्वरुप पिताम्बरले दोस्रो साता पनि आफ्नो हल उपस्थितीलाई खासै घट्न दिएन । देशभरका हलले ‘पिताम्बर’लाई आठौं दिनका लागि कम्तिमा १५८ शोज दिएका छन् ।
दोस्रो सातामा आईपुग्दा ‘पिताम्बर’को शोज केवल ७ प्रतिशतले मात्र गिरावट आएको देखिन्छ । शोजको आधारमा व्यापारमा उल्लेख्य गिरावट आएन भने ‘पिताम्बर’ले दोस्रो सातामा ग्रस कलेक्सन साढे तीन करोड माथि पुर्याउन सक्ने देखिन्छ । किन पनि भने, यो साता ‘पिताम्बर’का लागि व्यापारमा अड्को हाल्ने ‘केशरी : च्याप्टर २’ बाहेक अरु छैनन् ।
त्यसैगरी, ५१ दिनको कोशेढुंगा पार गर्ने बाटोमा लम्किरहेको ‘अञ्जिला’ले ३६ औं दिनमा सम्मानजनक कम्तिमा ४२ शोज पाएको छ । त्यसबाहेक ‘वसन्त’ २६ शोजमा खुम्चिएको छ भने ‘लाज शरणम’ले अझै ७ शोजमा आफुलाई टिकाईरहेको छ ।
