कलाशैली संवाददाता । अभिनेता राजेश हमाल र सन्नी रौनियारको नृत्य रहेको फिल्म ‘दैव संजोग’मा समावेश गरिएको ‘अच्छा लेकिन लण्डनको चिसोले समाउला’ बोलको गीत रिक्रियट गरिएको छ । जेठको ९ गतेबाट रिलिजमा आउन लागेको फिल्म ‘नरसिंहाः अवतार’मा यो गीत समावेश गरिएको हो । बुधवार पत्रकार सम्मेलनको आयोजना गर्दै सार्वजनिक गरिएको गीतमा अभिनेता हमालले नृत्य गरेका छन् ।
उनले यसपटक नयाँ पुस्ताका कलाकारहरू राज कटुवाल, नीति शाह, सनिषा भट्टराई, सरोज खनाल, दीपा शाही, उषा खड्गी र बाल–कलाकारहरु एभेलिना खड्का र समाइरा थापासँग सहकार्य गरेका छन् । उनले आफ्नै गीतमा पुनः नृत्य गर्न पाउँदा खुसी लागेको बताए ।
‘यो गीतमा नृत्य गर्दा पुरानो समय स्मरण गरें, उही मिठासमा तयार भएको छ । पुरानोझैँ यसलाई पनि रुचाउनु हुनेमा विश्वस्त छु’, अभिनेता हमालले भने । उक्त गीतमा सङ्गीतकार शम्भुजित बाँस्कोटा र गायिका देविका बन्दनाको स्वर थियो । रिक्रियट भर्सनमा शम्भुजित र गायिका रचना रिमालले स्वर दिएका छन् । गीतमा शम्भुजितकै शब्द तथा संगीत छ ।
सङ्गीतकार बाँस्कोटाले गीतलाई नयाँ पुस्ताले पनि रुचाउने विश्वास व्यक्त गरे । उनले भने,‘यो गीतलाई विभिन्न सोसल मिडियामा रुचाइएको पाएँको छु, गीतलाई नयाँ शैलीमा ल्याए पनि मिठास उही छ । यो गीत पुस्तान्तरण गरेका हौँ ।’ कविराज गहतराजले कोरियोग्राफी गरेको यो गीतको भिडियोलाई राजु विक्रम थापाले खिचेका हुन् । गीतको भिडियोको सम्पादन साहिल खानले गरेका हुन् ।
क्रियटिभ सिने आर्टस्द्वारा निर्मित फिल्ममा नीर शाह, अर्जुन श्रेष्ठ, रमेश चन्द सोडारी, आशा पौडेल, प्रशान्त ताम्राकार, राजिभ जंग बस्नेत, प्रकाश जंग कुँवर, प्रभु श्रेष्ठ, अमित गिरी, माइकल घिमिरे, सरोज शाह, किशोर भट्ट, टार्जन लगायतका कलाकारहरुको पनि अभिनय छ ।
