कलाशैली संवाददाता । अभिनेता प्रदीप खड्काको प्रेम चर्चा नौलो विषय रहेन । उनले काम गर्ने प्रायः को–एक्टरसँग उनको प्रेम सम्बन्ध रहेको चर्चा चल्ने गरेकै हुन्छ । पछिल्लो समय पनि उनको नाम जोडिएको छ, दिव्या रायमाझीसँग । फिल्म ‘एक्टर : टेक वन’ बाट गाँसिएको यो अनस्क्रिन जोडी ‘पिताम्बर’ मा दोहोरियो । ‘एक्टर : टेक वन’ को छायांकन ताका नै यी प्रदीप र दिव्या बीच प्रेम अंकुराएको चर्चा चलेको थियो । तर उक्त फिल्म नै असफल भएपछि उनिहरुको सम्बन्धले पनि त्यो बेला खासै मिडिया कभरेज पाएन ।
यतिबेला ‘पिताम्बर’ को सुरुवाती सफलतासँगै यी दुईबीचको सम्बन्धले पुनः चर्चा पाउन थालेको छ । दिव्यालाई ‘पिताम्बर’ मा आफ्नो जोडी बनाउन पनि प्रदीपकै हात रहेको चर्चा यतिबेला फिल्मनगरीमा छ । जबकी ‘पिताम्बर’ मा मीरा पात्रका लागि दिव्या अनुबन्ध हुनुअघि अभिनेत्री आँचल शर्मालाई लिइएको थियो । आँचल उक्त मीराको चरित्र निर्माणका लागि ‘पिताम्बर’ को वर्कशपमा समेत बसेकी थिइन् । तर पछि आँचललाई दिव्याले रिप्लेस गरिन् ।
यतिबेला हल–हल पुगेर दर्शकसँग भेट्दा होस् वा मिडियासँगको साक्षात्कारमा, प्रदीप र दिव्याको एकअर्काप्रतिको आत्मीय व्यवहारले धेरैको ध्यान खिचिरहेको छ । त्यसो त प्रदीप र दिव्याले यतिबेला आफुहरु सँगै देखिनु फिल्म प्रचारप्रसारका लागि हो भन्ने तर्क गर्न त सक्लान्, तर उनिहरुको घनिष्ठता महसुस गर्नेका लागि यो तर्क चित्त बुझाई नहुन पनि सक्छ ।
प्रदीपजस्ता ह्याण्डसम हिरो र दिव्याजस्ती ट्यालेन्टेड हिरोइनको जोडीको गसीप चल्नु अनर्थ त पक्कै हैन । को–एक्टरबीच यस्ता सकारात्मक चर्चा चल्नु र लाइमलाइटमा आईरहन पाउनु फाइदा कै कुरा पनि हो । फिल्ममा पनि यी दुईको केमेस्ट्री निकै जमेको देखिन्छ । यसैलाई हेरेर फेरि कुनै प्रोजेक्टमा यो जोडीलाई दोहो¥याउन सक्ने संभावना पनि उत्तिकै छ । त्यसपछि प्रेमको चर्चा झनै बढ्ला, प्रदीप र दिव्यातीर सम्बन्धका बारेमा तेर्सिने प्रश्न झन् बलियो होलान् नै ।
अहिले कै लागि भने यो जोडी प्रेम सम्बन्धमा रहेको कुरा साँचो हो वा हल्ला मात्र, त्यो त समयले नै बताउला । तर अहिलेलाई त दर्शकहरू यी दुईलाई पर्दामा होस् वा पर्दा बाहिर, सधैं सँगै देख्न चाहन्छन् ।
