कलाशैली संवाददाता । वर्ष २०८१ को सुरुआत गायक प्रकाश सपूतका लागि सुखद रह्यो । ‘बोक्सीको घर’ मा समावेश गीत ‘बुझिनँ मैले’ लोकप्रिय हुँदा यसको श्रेय गायक सपूतलाई त गयो नै, सोही सोही गीतले फिल्मलाई पनि व्यवसायिक सफलता दिलाएको धेरथोर जश पाए उनले । लगत्तै उनले अभिनय गरेको फिल्म ‘पूर्णबहादुरको सारंगी’ ले त भूतो न भविष्यतको रेकर्डतोड व्यापार गरिदियो । तर त्यसको जश भने प्रकाशले जति लिनसक्थे, आफ्नै कारण लिन सकेनन् । फिल्मको सुरुवाती प्रचारप्रसारमै उनी हिँडिदिएनन् । उनको यो शैलीको दर्शकले आलोचना पनि गरे ।
वर्ष २०८१ को अन्त्यमा प्रकाशले आफ्नै निर्देशनमा ‘वसन्त’ लिएर आए । गीतसङ्गीतमार्फत दर्शकमा लोकप्रीय गायक सपूतको गीतसङ्गीत, लेखन, निर्देशन र अभिनय रहेको फिल्म ‘वसन्त’ असफल भयो । यसले घरेलु बजारमा अपेक्षित व्यापार गर्नसकेको छैन भने नेपाली फिल्मको लागि ठूलो बजार मानिने अष्ट्रेलिया र अमेरिकामा अझै प्रदर्शन हुनसकेको छैन । सञ्चार तथा सूचना प्रविधि मन्त्रालयअन्तर्गतको ‘सेन्ट्रल म्यानेज्मेन्ट टिकट सिस्टम’ (बक्स अफिस) का अनुसार बसन्तले सोमबारसम्म प्रदर्शनको ११ औं दिनमा १ करोड ७७ लाख (ग्रस) कारोबार मात्र गरेको छ ।
फिल्म हेर्नेले पनि गायक सपूतको सिर्जनाको तारिफ गरेनन् । ‘वसन्त’ कै मोफसल वितरक छविराज ओझाले प्रकाशलाई निर्देशन वा निर्माणको ज्ञान भएको भए फिल्म राम्रो बन्न सक्थ्यो भन्दै घुमाउरो गरी ‘वसन्त’ आफुलाई गतिलो नलागेको प्रतिक्रिया मिडियामै दिए ।
व्यापक आलोचनाको सामना गर्दै वर्ष २०८१ को बिदाई गरेका गायक सपूतले नयाँवर्ष २०८२ मा विगतका कमीकमजोरीलाई मनन् गरेर पुनः अर्को फिल्म निर्देशन गरेर दर्शकको गुण र ऋण तिर्ने संकल्प गरेका छन् । फेसबुक पेजमार्फत सपूतले भनेका छन्, ‘एउटा साँचेर राखेको कथा भन्नुपर्ने थियो, वसन्त निर्माण गरेर त्यो भनें । गएको वर्ष जातीय विभेदविरुद्धको वर्ष भनेर काम गरेको थिएँ । त्यसैले यो विचमा लगातार विभेदविरुद्धका सिर्जनाहरू ‘जाले रुमाल फाट्यो’, ‘दमाई महाराज’ लगायत ल्याएँ । त्यहि समुदायलाई प्रतिनिधित्व गर्दै पूर्णबहादुरको सारंगीमा काम गरें । निर्देशकका रुपमा वसन्तमा देखिएको कमीकमजोरीलाई सच्याउदै एउटा फिल्म निर्देशन गरेर गुण र ऋण तिर्नु छ ।’
आफू सजिलै बहकिन सक्ने भएकाले जसले पनि बहकाउन सक्ने र फाइदा लिईरहेको तर्क सपूतले गरेका छन् । ‘तपाईलाई मेरो गतिविधिहरु देखेर झनक्क रिस उठ्दा गाली गलौज गरे पनि तपाईको मनमा मेरा सिर्जना र म प्रतिको धारणा नकारात्मक छैन भन्नेमा विश्वस्त छु, किनकि मेरो नियत नराम्रो छैन र तपाईको मन नराम्रो छैन । २०८१ मा मलाई पटक पटक जीवनमा जहाँबाट उठेको हो, फेरि त्यही खाडलमा जाकिएको महशुस भयो । सुटिङ भएका र हुन बाँकी फिल्मको काम र प्रदर्शन सकाएर फेरी गीतसङ्गीतमा काम गर्ने छु’, उनले उल्लेख गरेका छन् ।
