काठमाडौँ । नेपाली फिल्म क्षेत्रका कुशल अभिनेता दयाहाङ राई अभिनयसँगै रंगमञ्चमा चिनिएका नाम हुन् । रंगमञ्चमा उनले प्रस्तुती दिनुका साथै नाटक निर्देशन र निर्माण गरेका छन् । सोही कारण पनि उनले फिल्म निर्देशन गर्ने चर्चा बेलाबखतमा चल्ने गरेको छ । उनले आफ्नै नाटक ‘डिग्री माइला’ मार्फत ठूलो पर्दामा निर्देशकका रुपमा डेब्यु गर्ने चर्चा चलेको थियो । तर, उक्त शिर्षकमा उनकै मित्र निर्देशक रामबाबु गुरुङले फिल्म निर्देशन गरे ।
उनले निर्देशक बन्ने आट किन सकेका छैनन् त ? यसको लागि योजना बनेपनि सहि समय नआएको अभिनेता राईको बुझाइ छ । उनले फिल्म निर्देशन गर्ने योजना भने बनाएका छन् । ‘दुई वटा फिल्म निर्देशन गर्ने सोच छ, त्यो गर्छु होला । अहिले म अभिनयमै व्यस्त छु । तर, केही फरक र भन्नै पर्ने कथा भेटे भने निर्देशनमा हात हाल्नेछु’, उनले भने।
उनी रंगमञ्चमा सिकेको सीपलाई निर्देशनमा प्रयोग गर्ने सोचमा छन् । निर्देशन गर्ने फिल्म कलात्मक हुन्छ कि व्यावसायिक भन्ने प्रश्नले उनलाई पनि सोच्न बाध्य बनाउँछ । तर, उनि यसलाई विषय छनोटपछिको कामको रुपमा बुझेर पन्छ्याउने गरेका छन् ।
उनले अभिनय गरेका फिल्ममार्फत सबै दर्शक सबै दर्शकसम्म पुग्न प्रत्यन गरिरहेको महसुस हुन्छ । ‘लूट’ मार्फत परिचित बनेका अभिनेता राईले ‘कबड्डी’ ,‘जारी’, ‘सेतो सुर्य’, ‘गाउँ आएको बाटो’, ‘दयारानी’, ‘घर ज्वाईं’,’राजागञ्ज’ जस्ता कलात्मक र व्यावसायिक फिल्ममा काम गरेका छन् । यी फिल्मले उनमा भिन्नता ल्याउन सघाएको छ ।
