काठमाडौँ । केही समय यता हल रिभ्यु लिने क्रम बढेको छ । फिल्म प्रदर्शन भएपछि निर्मता, निर्देशक नै कलाकारसहित भिडिओ ग्राफर लिएर हलसम्म पुग्ने गरेका छन् । भिडिओमा भरिभराउ हल देखाउन र दर्शकको रिभ्यू लिन पछिल्लो समय यस्तो शैली अपनाइने गरिन्छ । तर, यही शैलीले दर्शकको गोपनियता भंग गरेको चर्चा हुन् थालेको छ ।
अहिले प्रदर्शनरत एक फिल्मको प्रतिक्रिया लिन हल पुगेका मिडियाकर्मीलाई दर्शकले भिडिओ नखिच्न चेतावनी नै दिए । उनले आफूसहित अन्य दर्शकसमेत मास्क लगाएर हलबाट बाहिरिन बाध्य भएको सुनाए । हलमा मिडिया ल्याएर खिचिरहेको प्रति प्रदर्शकले पनि चित्त बुझाएका छैनन् । तर, फिल्म निर्माताले यसलाई पब्लिसिटीको ‘पार्ट’ भनेपछि प्रदर्शक नाई भन्न सकिरहेका छैनन् ।
प्रदर्शक तथा वितरकहरुको छाया संस्था नेपाल चलचित्र सङ्घका अध्यक्ष नरेन्द्र महर्जनले यस विषयमा प्रदर्शकहरू बीच सल्लाह भइरहेको बताए । उनले भने,‘दर्शकको गुनासो हामीले पनि सुनिरहेका छौँ । निर्माण पक्षले पब्लिसिटी भनेपछि हामीले पनि हलमा खिच्न दिएका हौँ । दर्शक पनि कलाकार भेट्दा खुसी नै भएको पाएका छौँ । अब यसलाई कसरी व्यवस्थित गर्न सकिन्छ भन्ने विषयमा छलफल गर्दैछौं ।’
उनले प्रदर्शकहरू दर्शकको गोपनियताका अधिकार प्रति निक सजग रहेकोमा जोड दिए । केही समय यता फिल्म प्रिमियरमा सेलिब्रेटीले दिने प्रतिक्रिया भन्दा सार्वजनिक प्रदर्शनमा फिल्म हेरेका दर्शकले दिने प्रतिक्रिया प्रभाकारी हुने देखिएपछि निर्माता तथा निर्देशक मिडियाकर्मी, भिडिओग्राफर लिएर हल पुग्ने गरेका छन् ।
