काठमाडौँ । गएको वर्ष २०८१ लाई फिल्मकर्मीले सम्झिने एउटा कारण ‘पूर्णबहादुरको सारङ्गी’ हो । घरेलु बजारमा ४६ करोड ८० लाख (ग्रस) गरेर उच्च कारोबारको इतिहास रच्न सफल भएको वर्ष-२०८१ स्मरणयोग्य एवं सुखद बनाएको छ । यो फिल्मसँगै चार फिल्मले दश करोडभन्दा बढीको व्यापार (ग्रस) गरेका छन् । सञ्चार तथा सूचना प्रविधि मन्त्रालयअन्तर्गतको ‘सेन्ट्रल म्यानेज्मेन्ट टिकट सिस्टम’ (बक्स अफिस) मा रहेको तथ्यांकअनुसार ‘१२ गाउँ’, ‘छक्कापञ्जा ५’ र ‘बोक्सीको घर’ ले पनि आफूलाई दश करोड क्लबमा पार्न सफल भएका हुन् ।
विसं २०८१ वैशाख १४ देखि प्रदर्शनमा आएको केकी अधिकारी स्टारर ‘बोक्सीको घर’ ले राम्रो व्यापार गर्न सफल भयो । फिल्ममा समावेश गीत ‘बुझिन मैले, बुझाइ देऊ कसैले’ सांगीतिक रुपमा सफल हुँदा त्यसको प्रभाव व्यापारमा पनि प्रत्यक्ष प¥यो । रंगकर्मी सुलक्षण भारतीको पहिलो फिल्म निर्देशन र केकी मुख्य भूमिकामा रहेको फिल्म भएकोले पनि ‘बोक्सीको घर’ लाई प्रदर्शन पूर्व यसलाई कम आँकिएको थियो । तर, यसले देशभित्र र बाहिर गरेको व्यापार भने अकल्पनीय रह्यो ।
‘बक्सअफिस’को तथ्याङ्कअनुसार यसको घरेलु बजारमा रु १० करोड २ लाखको व्यापार भएको छ । यसको सफलताको श्रेय गीतसङ्गीत र विषयवस्तुलाई जान्छ । त्यसकारण यो वर्ष कलाकारको ‘स्टारडम’ भन्दा ‘कन्टेन्ट’ चलेको वर्षका रुपमा हेर्न सकिन्छ । यसपछि दसैँमा प्रदर्शन भएको ‘१२ गाउँ’ र ‘छक्का पञ्जा–-५’ ले दर्शकको राम्रो साथ पायो ।
‘बक्सअफिस’को तथ्याङ्कअनुसार ‘१२ गाउँ’ ले १९ करोड ९२ लाख र ‘छक्कापञ्जा – ५’ ले १५ करोड २० लाख रुपैयाँ को व्यापार गरेको छ । अन्य फिल्मको व्यापार बढेता पनि शृङ्खलाबद्ध रुपमा आइरहेको ‘छक्का पञ्जा’ को व्यापार भने अघिल्लोको तुलनामा घटेको छ ।
