काठमाडौँ । नेपाली फिल्म क्षेत्रमा फिल्म निर्माणको अनुपातमा अब्बल कलाकार कम भएको गुनासो सुनिने गर्छ । थुप्रै निर्माता, निर्देशक हातमा स्क्रिप्ट र बैंकमा रकम डिपोजिट गरेर कलाकार अनुबन्धदेखि अनुबन्ध भएकाको डेट मिलाउन महिनौं पर्खनुपर्ने बाध्यता छ । तर बाध्यता स्वयं कलाकारको पनि छ । चरित्र बाँच्न सक्ने वा अभिनयमा पारंगत कलाकारका लागि फिल्म खेल्ने समय मिलाउन त हम्मे हम्मे छ नै, फिल्म रिलिजका समय प्रचारप्रसारमा हिंड्न पनि उस्तै सकस । गत शुक्रबारदेखि यस्तै सकस झेलिरहेका छन्, अभिनेता दिव्यदेव पन्तले । उनी अभिनित दुई फिल्म पिताम्बर र कर्मा चैत २९ देखि एकसाथ प्रदर्शनमा आएपछि यी अभिनेतालाई भ्याईनभ्याई भएको हो ।
यो नेपाली चल्तीका कलाकारका लागि कुनै अनौठो कुरा त हैन । राजेश हमालदेखि अहिलेका दयाहाङ राई यस्ता कलाकार हुन्, जसका फिल्म नै प्रायः एकापसमा भिडेको बढि पाईन्छ । गत फागुन २९ देखि प्रदर्शनमा आएको ‘अञ्जिला’ र त्यसको भोलीपल्ट रिलिज भएको ‘राजागञ्ज’ दुवैका अभिनेता दयाहाङ बक्सअफिसमा आफैंसँग भिडिरहेका थिए । विदेशी फिल्म फेष्टिभलमा पहिल्यै प्रशंसा बटुलिसकेको ‘राजागञ्ज’ले घरेलु दर्शकलाई हलसम्म खासै तान्न नसकेपनि बायोपिक ‘अञ्जिला’ ले भने सुखद व्यापार गर्यो ।
‘आवरण’ मार्फत् फिल्मी यात्रा थालेपनि दिव्यदेव पन्त आम दर्शकमाझ चिनिन थालेको एक वर्ष मात्रै भयो । २०८० चैत ९ मा रिलिज भएको ‘महाजात्रा’पछि नोटिसमा परेका उनी ‘एक्टर : टेक वान’मा पनि देखिए । यतिबेला फुटकर पात्र, चरित्रबाट आफुलाई स्थापित गर्दै लगिरहेका दिव्यदेवले फिल्म अभिनयको यात्रा भने मुख्य अभिनेताका रुपमा ‘रुदाने’बाट गर्न खोजेका थिए । थाहा अभियानकर्मी रुपचन्द्र विष्टको जीवनीमा आधारित उक्त फिल्ममा उनी विष्टकै मुख्य भूमिकामा थिए । झन्डै १० वर्षदेखिको उक्त फिल्म यतिबेला पोष्ट प्रोडक्सनमा अड्किरहेको छ ।
छोटो समयमा नै व्यस्त बन्दै गईरहेका दिव्यदेव गत सातादेखि भने बक्सअफिसमा आफुसँग आफैं भिडिरहेका छन् । अर्थात्, उनी प्रहरीको भुमिकामा रहेको ‘कर्मा’ र खलपात्रको भुमिकामा रहेको ‘पिताम्बर’ यतिबेला व्यवसायिक प्रतिष्पर्धामा छन् । नाटक हुँदै फिल्म अभिनयमा छिरेका दिव्यदेवले एकसाथ आफ्नै फिल्मको भिडन्तलाई पहिलोपटक महसुस गरेका हुन् ।
‘मेरा दुई फिल्म एकसाथ प्रदर्शन भएको पहिलोपटक हो । दुवैमा मैले आफू देखिने भन्दा पनि पात्रलाई पर्दामा ल्याउने कोसिस गरेको छु । अभिनेता म भएपनि पर्दामा देखिने पात्र फरक भएकाले दर्शकले त्यहाँ दिव्य नभई त्यस फिल्मको पात्र नै पाउनु हुनेछ’, अभिनेता पन्तले भने ।
कथालाई लिड गर्ने पात्रमा मात्र आफूलाई सोच्ने यिनी अहिले कथालाई अगाडि बढाउने पात्रमा आफूलाई प्रस्तुत गर्न ’कन्भिन्स’ गरे । फलतः उनी अहिले अधिकांश निर्माता, निर्देशकको रोजाईमा पर्ने गरेका छन् । तर, टाइप कास्ट हुन्छु कि भन्ने डर पनि उनलाई छ ।
‘अभिनेताले सबै किसिमको फिल्ममा काम गर्नुपर्छ भन्ने लागेर नै मैले आफूलाई ‘एक्सप्लोर’ गरिरहेको छु । व्यावसायिक होस् वा कलात्मक म आफ्नो पात्रलाई जीवन्त र भिन्न बनाउन कोसिस गरिरहेको हुन्छु । हरेक विधाको फिल्ममा काम गर्दा यसले मेरो अभियान यात्रामा अनुभव थप्छ भन्ने विध्वास छ, तर आफ्नै कामको मुल्यांकन गर्न केही समय विश्राम लिने योजनामा छु’, उनले भने ।
लगातार काम गर्दा त्यसको प्रभाव समीक्षा गर्न नपाउने भएकाले ‘ब्रेक’ लिने योजना बनाएको उनले प्रस्ट्याए ।
