बलिउड । दक्षिण भारतीय फिल्म ‘पुष्पा’ बाट इतिहास रचेका अभिनेता अल्लु अर्जुनले आफ्ना फ्यानलाई उपहार दिएका छन् । मंगलबार जन्मदिनको उपलक्ष्यमा उनले नयाँ फिल्म घोषणा गरेका हुन् । यो फिल्मका लागि उनले निर्देशक एटलीसँग सहकार्य गर्दैछन् । सन पिक्चर्सले निर्माण गर्ने फिल्मको नाम अहिले राखिएको छैन ।
यो अल्लु अर्जुनको २२ औं र एटलीको छैटौं फिल्म हो, त्यसैले फिल्मलाई अस्थायी रूपमा ‘एए२२-ए६’ ह्यासट्याग दिइएको छ । यो फिल्मलाई एटलीले निर्देशन गर्नेछन् भने कलानिधि मारन यसको निर्माता हुन् ।
सार्वजनिक गरिएको एउटा भिडियोमा एटली र अल्लु अर्जुन आफ्नो नयाँ प्रोजेक्टको लागि सँगै काम गरिरहेको देखिन्छ । भिडियोमा उनले फिल्ममा हस्ताक्षर गरेको र लस एन्जलसको भीएफएक्स स्टुडियोको भ्रमण गरेको पनि देखाइएको छ ।
