कलिउड । चलचित्र विकास बोर्डले नवनियुक्त सदस्य सन्तोषबाबु लोहनीलाई स्वागत तथा कार्यकाल सकिएका सदस्य राजु खत्रीको विदाई गरेको छ । सञ्चार तथा सूचना प्रविधि मन्त्रालयले बोर्डको नयाँ सदस्यका रूपमा अभिनेता एवं निर्देशक लोहनीलाई गत चैत १४ गते बिहीबार नियुक्त गरेको थियो ।
विसं २०४९ मा निर्माण भएको चलचित्र ‘अपमान’ मा अभिनय गरेर कलाकारिता सुरु गर्नुभएका लोहनी निर्देशन तथा निर्माणमा सक्रिय छन् । बोर्डको सदस्यमा नियुक्त भएसँगै उनले चलचित्रको प्रवर्द्धन, नीति निर्माण र डिजिटल माध्यममार्फत विश्वव्यापी प्रचारप्रसारका लागि कार्य गर्ने बताए ।
यसअघि उहाँ बोर्डअन्तर्गत अन्तरराष्ट्रिय चलचित्र प्रवर्द्धन समितिको सदस्य पनि छन् । बोर्डका अध्यक्ष दिनेश डिसीले नवनियुक्त सदस्य लोहनीलाई स्वागत गर्दै उहाँको अनुभव र योगदान चलचित्र विकासका लागि महत्त्वपूर्ण हुने विश्वास व्यक्त गरे ।
यही चैत ६ गतेदेखि बोर्डमा दुई सदस्य कार्यकाल सकिएपछि रिक्त रहेको पदमा मन्त्रालयले सदस्य लोहनीलाई नियुक्त गरेको हो । यस्तै, चैत १८ मा कार्यकाल सकिने बोर्ड सदस्य खत्रीलाई आज एक कार्यक्रमका बीच बोर्डले विदाई गरेको छ । बोर्डको सय सय ४५ औँ वैठकको अवसर पारेर स्वागत तथा विदाइ गरिएको अध्यक्ष डिसीले जानकारी दिए ।
उनका अनुसार वैठकले नव नियुक्त सदस्य लोहनीलाई बक्सअफिस प्रणाली कार्यान्वयन, चलचित्रको अन्तर्राष्ट्रिय प्रवर्द्धन, आर्थिक सहयोग सिफारिस र मोफसलका चलचित्र मूल्याङकन तथा छनौट समिति संयोजक बनाएको छ ।
