हलिउड । अभिनेता रोबर्ट डाउनी जुनियर मार्भल फ्यानका लागि ‘आइरन म्यान’को उपनामले परिचित छन् । ‘एभेन्जर्स : इन्ड गेम’ मा उनको पात्रको अन्त्य हुँदा ‘आइरन म्यान’ देखि उनलाई पछ्याउने दर्शक दु:खी भएका थिए । ‘क्याप्टेन अमेरिका’ र ‘आइरन म्यान’ को विदाईसँगै मार्भलको एउटा युगको अन्त्य भएको थियो । एक दशक भन्दा लामो समयदेखि मार्भल युनिभर्समा बनेका फिल्म हेरिरहेका दर्शक निराश बनेका थिए ।
त्यसपछि रोबर्टलाई दर्शकले पुनः मार्भल सिनेम्याटिक युनिभर्समा खोजे, तर भेटेनन् । अन्तत पाँच वर्षपछि उनी ‘एभेन्जर्स: डूम्सडे’ मा देखिने भएका छन् । केही समय अगाडि मार्भलले एभेन्जर्स अन्तर्गतको ‘डूम्सडे’ र ‘सेक्रेट वार’ घोषणा गरेको छ ।
कमिक पुस्तकहरूमा एक प्रख्यात खलनायक डा भिक्टर भोन डूमको रूपमा उनी मार्भलको सिनेम्याटिक संसारमा पुनः छिरेका छन् । मे २०२६ मा रिलिज हुने फिल्ममा अभिनय गर्ने सन्दर्भमा उनले भने,‘मलाई जटिल पात्रहरू खेल्न मन पर्छ।’
उनलाई ‘आइरन म्यान’ को भूमिकामा हेर्ने दर्शकको चाहना भने अब पुरा हुनेछैन ।
