बलिउड । ‘केजीएफ’ शृंखलामार्फत यश आफू मात्र चिनिएनन्, आफ्नो कन्नड फिल्म उद्योगलाई पनि चिनाए । उनै यश नयाँ फिल्म ‘टक्सिक’ मा देखिदैछन् । फिल्मको निर्माण पक्षले उनको जन्मोत्सवको अवसर पारेर केही समय अगाडि फिल्मको झलक सार्वजनिक गरेको थियो । एक मिनेट लामो भिडियोमा यश ‘रोयल लुक्स’मा प्रस्तुत भएता पनि सोच अनुसारको चर्चा भने दिन सकेन ।
फिल्ममा यशको पात्र सन्की र मनमौजी स्वभावको रहेको भिडिओ हेरेर अनुमान लगाएका छन् । यद्यपि यशलाई ‘रकी’ अवतारमा नै बढी सुहाएको प्रतिक्रिया दर्शकले दिएका छन् ।
फिल्मको निर्माता यश आफैं हुन् । उनको प्रोडक्सन कम्पनी मोन्स्टर माइन्ड क्रिएशन्सको ब्यानरमा निर्माण भएको फिल्मलाई गीतु मोहनदासले निर्देशन गरेकी हुन् । ‘टक्सिक’को प्रदर्शन मिति भने घोषणा गरिएको छैन । यसमा उनको जोडी कियारा आडवाणीसँग बाँधिएको छ भने दिदीको भूमिकामा अभिनेत्री नयनतारा रहेको चर्चा छ । यो फिल्मले अभिनेता यशको ‘केजीएफ’ सिरिजबाट बनेको लोकप्रियता बढाउनेछ या घटाउने छ ? यो अहिले इन्टरनेटमा छलफलको विषय बनेको छ ।
