कलाशैली संवाददाता । अमेरिकामा आयोजना हुने ९८औँ ‘द एकेडेमी अफ मोशन पिक्चर आर्ट्स एन्ड साइन्सेस (अस्कर अवार्ड)’ मा नेपालको प्रतिनिधित्व गर्न फिल्म ‘अञ्जिला’ पठाउने निर्णय विवादमा परेको छ । नेपालस्थित अन्तर्राष्ट्रिय फिचर फिल्म छनोट समितिले अन्तर्राष्ट्रिय फिचर फिल्म विधामा यो फिल्मलाई सिफारिस गरेको खबर बाहिरिएसँगै निर्णयले विवाद निम्त्याएको छ ।
अस्करमा प्रतिस्पर्धाका लागि दुई नेपाली कथानक फिल्म ‘अञ्जिला’ सँगै ‘गुन्यु चोलो – द ड्रेस’ सहभागी थियो । आफ्नो फिल्मले नेपाललाई प्रतिनिधित्व गर्न नपाउने भएपछि निर्देशक समुन्द्र भट्टले विरोध जनाएकी छिन् । निर्देशक भट्टसहित फिल्म ‘गुन्युचोलो’ निर्माण पक्षले कडा असन्तुष्टि व्यक्त गर्दै निर्णय खारेजीको माग गरेका छन् ।
निर्माता कम्पनी स्काइ ओसन इन्टरटेनमेन्ट प्रालिले आइतबारसम्म निर्णय नसच्यिए अमेरिकास्थित अस्कर मुख्यालयमा उजुरी गर्ने चेतावनी दिएको छ । साथै, समितिको विघटनको माग पनि राखिएको छ । एक पत्रकार सम्मेलनको आयोजना गर्दै निर्देशक भट्टले समितिको कार्यविधिमा गम्भीर कमजोरी रहेको आरोप लगाइन् ।
उनले नेपालस्थित अस्करका लागि फिल्म छनोट गर्ने समितिका एक सदस्य अमेरिकामा रहेको र एक सदस्यको स्वार्थ बाझिएको बताएकी छिन् । उनले पत्रकार जीवन पराजुली आफैँ फिल्म ‘अञ्जिला’ को मिडिया संयोजक रहेकाले उनले दिएको निर्णयमा स्वार्थ बाझिएको आरोप लगाएकी छिन् । यो विवादमा यस वर्ष नै रिलिज भएका नेपाली फिल्म ‘राजागञ्ज’ का निर्देशक दीपक रौनियार र ‘भूठान’ का निर्देशक विनोद पौडेलले पनि समितिको कार्यशैलीप्रति असन्तुष्टि जनाएका छन् । उनीहरूले छनोट समितिले फिल्म सहभागी गराउने सूचना र समय पर्याप्त नभएको आरोप लगाएका छन् । समितिको आधिकारिक लेटरप्याडअनुसार सदस्यहरूमा मञ्जुकुमार श्रेष्ठ, लोकेन्द्र पराजुली, गौतम धिमाल, जीवनकुमार पराजुली र चिरञ्जीवी गुरागाइँ छन् ।
त्यसो त निर्णय सम्बन्धी अन्तिम अधिकार निर्णायक समिति मै हुन्छ । उनीहरूले दिने अंकका आधारमा फिल्म छनोट हुने गर्छ । यद्यपि, नेपालमा प्रतिनिधित्व गर्ने फिल्म लगभग अनुमान लगाइएको हुन्छ । यस वर्ष प्रदर्शन भएका ‘राजगंज’, ‘भूठान’ र ‘जार’ जस्ता फिल्मले पर्याप्त सुचना नपाएका कारण प्रस्तिस्पर्धामा सहभागी हुन् पाएनन् । उनीहरूले नेपाललाई प्रतिनिधित्व गर्ने अपेक्षा गरिएको थियो ।
छनोट समितिले निश्चित शुल्क लिएर फिल्म दर्ताका लागि आह्वान गर्छ । त्यसको समय २० देखि ३० दिनसम्म हुनेगरेको छ । दर्ता आह्वान गर्न सूचना कसरी जारी गर्ने भन्ने विषय खुलेको छैन । मापदण्डमा सदस्यहरू स्वतन्त्र हुनुपर्ने र आवेदन दिएको फिल्मसँग प्रत्यक्ष स्वार्थ नबाझिने स्पष्ट उल्लेख छ । तर, फिल्म ‘अञ्जिला’ को मिडिया संयोजक नै छनोट समितिमा मताधिकार भएका सदस्य भएपछि विवाद चर्किएको हो । यो विवादले नेपाली फिल्म क्षेत्रमा पारदर्शिताको बहस चर्काएको छ ।
