कलाशैली संवाददाता ।भारतीय अभिनेत्री तथा डान्सर नोरा फतेही शनिबार बिहान काठमाडौं आइपुगेकी छन्। दुबईबाट आएकी उनलाई त्रिभुवन अन्तर्राष्ट्रिय विमानस्थलमा आयोजकले स्वागत गरे।
पहिलोपटक नेपाल आएकी फतेहीले नेपाली प्रशंसकको माया र आफ्ना गीतमा बनाइएका भिडियोको प्रशंसा गर्दै खुसी व्यक्त गरिन्।
आज साँझ बौद्धमा आयोजित ‘नोरा फतेही लाइभ इन नेपाल’ कार्यक्रममा उनले आफ्नो चर्चित गीत ‘स्नेक’सहित प्रस्तुति दिनेछिन्। ‘ह्युमन रेस्पेक्ट नेपाल’को सहयोगार्थ आयोजित यो कार्यक्रममा नेपाली कलाकारहरू दुर्गेश थापा, तेरिया फौजा मगर, समर्पण लामा र ‘भ्वाइस अफ नेपाल सिजन ६’का प्रोसेस पाण्डे, रोशन राई, अर्पणा आचार्य, प्रमेश राई, इन्द्रकला राईले पनि प्रस्तुति दिनेछन्।
आइतबार बिहान फतेहीले काठमाडौंका सांस्कृतिक र पर्यटकीय स्थलको भ्रमण गर्ने र अपराह्न दुबई फर्कने इभेन्ट म्यानेजर मनीष कार्कीले बताए। उनका २३ सदस्यीय टोली शुक्रबार नै काठमाडौं आइसकेको छ।
आयोजक वल्र्डवाइड फिल्मस् नेटवर्क प्रालिका अनुसार खल्ती र आइएमई पेबाट टिकट बिक्री भइरहेको छ।
तस्विरहरु : कुबेर डंगोल ⁄ कलाशैली
